Sundmaður og skíðakona fremst íþróttafólks fatlaðra 2010

Erna Friðriksdóttir og Jón Margeir Sverrisson hafa verið útnefnd Íþróttakona og Íþróttamaður Íþróttasambands fatlaðra árið 2010 Jón Margeir er 18 ára sundmaður úr Ösp/Fjölni en Erna er 23 ára gömul skíðakona frá skíðadeild Hattar á Egilsstöðum. Voru viðurkenningar veittar á Hótel Sögu.

Jón Margeir hefur farið mikinn á árinu 2010 og sett alls 19 Íslandsmet í 11 greinum, 16 met í 25m laug og 3 met í 50m laug. Erna, sem gat því miður ekki verið viðstödd þegar viðurkenningar voru veittar, þar sem hún er nú við æfingar í Winter Park í Colorado í Bandaríkjunum, varð fyrr á þessu ári fyrsta íslenska konan til þess að öðlast þátttökurétt á Vetrarólympíumóti fatlaðra.